اورمو ايشچيلري : “آذربایجان سایتی”
آلدیغیمیز خبر اساسیندا شنبه گونو تیر آیی‌نین ۱۸ینده آذربایجانین قدیم مبارز کارگرلریندن اولان و عؤمرونون ۷۰ ایلینی زحمتکشلرین سعادتی اوغروندا مبارزه‌یه حصر ائدن، اصغر شکری(عسگر عمی) قیسا بیر خسته‌لیگدن سونرا، تهرانین حومه‌سینده یئرلشن یاشادیغی خادم‌آباد کندینده وفات ائتمیشدیر.
اصغر شکری(عسگر عمی) ۱۳۰۳ینجی ایلده ساوالانین اتک‌لرینده یئرلشن گنزه کندینده آنادان اولوب، باشا دوشن گوندن اربابلارین و خانلارین کندلی‌لره و رعیت‌لره ائتدیگی ظلم و ستملرین شاهدی اولوب، یئنی‌یئتملیگیندن اونلارا قارشی مبارزه‌یه اوز گتیرمیشدیر. او بو مبارزه‌سینده همن ایللرده آذربایجان کندلری‌نین بیر چوخوندا گئتدیگی کند حرکاتی‌له برابر اؤز منطقه‌لرینده‌کی اربابلارین و خانلارین علیهینه جریاندا اولان سیلاحلی کند حرکاتینا قوشولور.
گنج عسگر بیر مدتدن سونرا تعقیبه معروض قالیر، یاشادیغی یئردن قاچاق دوشور و تهراندا ساکن‌لشیر. گنج مبارزین ظلم و استثمار علیهینه مبارزه‌سی تهراندادا دوام ائدیر و او شهر زحمتکشلری سیراسیندا بیر کارگر اولاراق ایشله‌دیگی بوتون کارخانالارین صنفی اعتراضلاریندا، اعتصابلاریندا بیر فعال انقلابچی کیمی اشتراک ائدیر. بو یولدا “شورای متحده کارگری” تشکیلاتینا قوشولور و بو تشکیلاتین یورولماز عضوی کیمی ایشچی‌لرین صنفی مبارزه‌سینی رهبرلیگ ائدیر.
او عؤمرونون سونوناقده‌ر صنفی آزادلیغا اولدوغو عشقینه و زحمتکشلرله باغلادیغی عهد پیمانینا صادق قالیر، دفعه‌لرله حبسه آلینیر و بو یولدا شاه و اسلام رژیملری دورونده عومرونون ۱۰ ایلینی زندانلاردا کئچیریر.عسگر عمی یاشی‌نین چوخ اولماسینا باخمایاران سون دفعه اوین زندانی‌نین قارشیسینداکی اعتراضا قوشولدوغو اوچون توتولور و بیر آز مدتدن سونرا بوراخیلیر. او انقلابدان سونرا سیاسی مبارزه‌سیله یاناشی آذربایجان ادبی- مدنی انجومنلری‌نین سیرالاریندادا فعال اشتراک ائتمیش و بیر نئچه فرهنگی درنک‌لرین قورولماسینادا یاردیمچی اولموشدور.
“آذربایجان سایتی” امکداشلاری آدیندان یورولماز مبارز کارگر، آذربایجان ادبیاتی و مدنیتی‌نین قایغی‌کشی اصغر شکری(عسگر عمی) نین وفاتینی اونون محترم عائله‌سینه، دوست و تانیشلارینا باش ساغلیغی وئریر، ابدی خاطره‌سینه عشق اولسون دئییریک.
هیچ نظری موجود نیست:
ارسال یک نظر
از اينكه به اين مطلب نظر مي دهيد متشكريم
ياشاسين آزربايجان