سایین دیلداشلار بایرام (اسفند) آیینین ایكیسی(21 فوریه) دونیالیق آنا دیلی گونودور، بو گونو بوتون اینسانلارا اؤزللیك له تورك دیللیلره تبریك دئییرم.
آنا دیلی اینسانلارین یاشاییشیندا اؤنملی رول اویناییر،بوتون اینسانلار اؤز آنا دیللرینده استعدادلاری بللی اولونور و اوزه چیخیر،یعنی هر اینسان بوتون دوشونجه لرینی اؤز آنا دیلینده دوشونور و دونیایا سؤیله ییر.،ایستر اؤز دیلینده سؤیله سین ،ایسترسه ده باشقا دیلده دوشونجه سین بللی ائتسین،آنجاق بو اونون آنا دیلینده یارانیب سؤیله نیلن دوشنجه دیر.
اؤرنك اولاراق ، دیرلی یازیچیمیز رحمتلیك «غلامحسین ساعدی» بوتون یازیلاریندا توركجه دوشونوب و باشقا دیلده یازیب و دوغروداندا اثرلری بعضا تایسیز اولا بیلیبدیر.
بو آرادا هر كیمسه اؤز آنا دیلیندنده ییه (صاحب) چیخمالیدیر و اونا قوللوق ائتمه لیدیر.رحمتلیك اوستاد «شهریار» بو ایشده باشاریلی اولوب و عؤمروندن نئچه ایل كئچندن سونرا آنا دیلینه قوللوق ائتمه ییی دوشونوب و تورك دیلینه بؤیوك بیر قوللوقچو اولوبدور.چاغداش زاماندا شهریار،«حیدر بابایا سلام» اثرینی یازماقلا آذربایجان توركجه سینه یئنی بیر روح ایله جان وئریب و عئینی زاماندا اثری دونیا سئویه سینده ان دیرلی اثرلردن اولوبدور.
بونلاری دئمكده بونو بیلدیرمه للیم كی هر كیمسه اؤز یئرینده و نووبه سینده آنا دیلینه سایغی و حورمت ساخلاییب اونو اوجا یئرلره یئتیره بیلر.
اوشاغا توركجه آد قویوب اونا هر دیلدن اؤنجه اؤز آنا دیلینی اؤیرتمك ان كیچیك بیر ایش اولا بیلر و هر بیر تورك اینسانی ان آزی بو ایشی گؤره بیلر.
بوتون دیللر «تانری»- دان بیزیم اوچون بؤیوك بیر پای و نعمت دیر و بو دیللری قوروماق(حفظ ائله مك) بوتون اینسانلارین گؤره ویدیر(وظیفه سیدیر).
آنا دیلینین یانیندا باشقا دیللریده اؤیرنمه لییك و بؤیوك لریمیز دئمیش كن «نئچه دیل بیلن ،نئچه اینسان دئمكدیر».
هئچ دیله سایغیسیزلیق ائتمه مه لییك و بونون یانیندا نئچه دیل باجاردیغیمیزا رغماً آنا دیلیمیزین باجارماغی و اونو قوروماغی هئچ واخت اونوتمامالییق.
و سونوندا دئمه لییم:
آنا دیلی بیر میللتین چیرپینان اوره گیدیر..
بو اورك دؤیونسون دئیه آنا دیلیمیزی گله جك نسیل لریمیزه قورویوب وئرك.
ساغ قالین – ائلمان اورمو اوغلو
هیچ نظری موجود نیست:
ارسال یک نظر
از اينكه به اين مطلب نظر مي دهيد متشكريم
ياشاسين آزربايجان