صفحات

۱۳۹۰ مرداد ۳۱, دوشنبه

ايران-اين آذربايجانا هوجوملاري - " ميللي شورا " -نين دوروم ديرلنديرمه سي

اورمو ايشچيلري :
ايران-اين آذربايجانا هوجوملاري - " ميللي شورا " -نين دوروم ديرلنديرمه سي- 08/2011
اوزدن ايراق گئنئرال " فيروزابادي " ايران اوردوسونون باش قراگاه ريسي نين گئچن هفته کي هوجوملاري، او اؤلکه نين يوردوموزون آزاد اولونموش بؤلمه سينه نه ايلک، نه ده سون هوجومو اولاجاقدير. اونون اوچون بو تحليلين هوجوملار تاريخچه سيني دئييل، اونون سبب و نتيجه لري ايليشکيسيني ديرلنديرمک داها فايدالي ساييلماقدادير. چونکي، ايران دؤولتي نين بيز آذربايجانليلارا و آذربايجان جومهورييتينه اولان دوشمنچيليک موناسيبتي گوندن آيدين اينکار ائديلمز بير گرچکدير. بوگون اؤزونو دئموکرات آدلانديراراق آمئريکادا رئژيمه آلتئرناتيولرله بيرگه چاليشان اکبر گنجي نين 1991- ده ايران خاريجي ايشلرينده يوکسک مقامي ايله " آذربايجان جومهورييتي بير قارينج توپراق اوستونده وارسا ايرانا تهلوکه دير " سؤزلري اونودولماميشدير.

اصلينده ائرمنيستان آذربايجان آراسينداکي " قاراباغ " مونقيشه سينده فارسلارين ائرمنيلرين يانيندا دورماسيدا بو دؤولت سيايستي نين بير گؤسترجه سيدير. اونلار، آذربايجانين دوروشونون، ايرانين پارچالانماسينداکي دورومونو اؤيله سينه جيدييه آليرلار کي، ايسلام آدي داشييان دؤولتلري نين، ايسلام عالمينده بؤيوک قيناغا سبب اولان بو سيياستي، تأسوفلنه رک دوام ائتديرير و ائمنيستانا يارديملاريني سوردورورلر.

دوروم بئله ايکن، اصلينده بيزيم و شومالي آذربايجانين دوغرو يول خريته سي سئچمه سي نين اهمييتي داها اؤنم داشيماقدادير. باشقا ايفاده ايله، تورکو اؤزونه تاريخي دوشمن سايان، آريا ايرقينا دايانان بير فارسچي شووينيست تفککورله دؤولت قورماغا چاليشان، ديل-دين-ساختا تاريخدن سويستيفاده ائده رک بيزي عزمه يه يؤنلن بو قارا گوجله نه ائتمه ليگيک سوالينا دوزگون جاواب تاپماليييق. باشيميزي قارا قويلاييب، اؤزوموزو آلداتماقلا، اونلارين يالانچي تبليقاتي، ايسلام آدي ايله گنجلريميزي آلداداراق دؤولتيميزه دوشمن کسديرمسي، سيلاهلي قوووه تهديدلري، نهايت بالانسي پوزوب دورومو داها دا تهلوکه لي چيزگييه گتيره بيلر.

بوگونکو بئينالخالق موناسيبتلري ديقتله تحليل ائدرسک، سوپئر گوجلر آراسينداکي باشقا ميلتلر و اؤلکه لرين زنگينليکلريني تالاماق رقابتي نين دوام ائتديگيني گؤرمه مک مومکون دئييل. بونون يانيندا، بو گوجلو اؤلکه لرده کي آشيري ميلتچيليگين گتيرديگي سونوچلاريدا اينکار ائتمک اؤزونو آلداتماقدان باشقا بير معنا داشيماز. بوگون ايران آدلانان اؤلکه ني نين طبيعي قايناقلاري نين تالانماسيندا بير زامانلار، اينگيليس-فرانسا- هوللاند و دانمارک کيمي اؤلکه لر آراسيندا اولان رقابت، سونرالار روس- آمئريکا- اينگيليس دايره سينه گيرديگي بيلينن بير حقيقتدير. بوگون بو گوجلرين دئييشمه سي ايله بير ياندا روس- چين و حتّي هيندوستان کيمي اؤلکه لر دورارکن ترزي نين او بيري گؤزونده آمئريکا- اينگيلتره و باشقا آوروپا دؤولتلري يئرلشمکده دير. ائرمنيستان مسلسينده روس- ايران ماراقلاري بير بيري نين اوستونه دوشدويو حالدا، آمئريکا و آوروپادا خيريستييانليق دوشونجه سي نين اؤن پلاندا اولدوغو دانيلمازدير. بو داورانيشي ايرقچيليکلا اؤلچمک بيرده اونا گؤره اويوم ساغلاييرکي، نازي آلمانيانين، ايران آدي آلتيندا آرياچيليق حاقينداکي گؤروشو، هله ده خاطيره لردن سيلينمه ميشدير.

بو دوروم ايکي نظرييه ني آچيق و آيدين ثوبوت ائتمکده دير:

1- هاق گوجلونوندور فلسفه سي

دونيا دئموکراتلاري و اينسانليق نامينه چاليشان قروپ و قروملارين فعالييتيني اينکار ائتمک اولماز.

1

آنجاق، بوتون بو چاغيريشلارا، اينساني دويگولارا، باريش-دئموکراسي و موزاکيره يه وئريلن اؤنمه باخميياراق اؤلکه لر آراسينداکي پروبلملرين حلينده گوجلولرين قاليبييتي ده اينکار ائديلمزدير. باشقا ايفاده ايله، ديپلوماتيک گئديشاتين يانيندا، بير ميلتين آرخاسيندا گوجلو بير قوووه دايانماسا، اودوزا اودوزا يولونا دوام ائده جکدير. ايرانين، آذربايجانا گئتديکجه آرتان تزيقلري نين بير سببي ده گوجلو قارشي دوروشون اولماماسيدير. يالوارماقلا پروبلملر چؤزولمه لييدي ايسه، دئمه لي ايندي بو هوجوملار دا اولمامالييدي. تجروبه گؤسترميشدير کي، بو اوصول موثبت نتيجه وئرمه ميشدير، ترسينه، فارس حاکيمييتيني بير آز دا شيرنيکديرميشدير. آيديندير کي، بوگونکو شراييطده، بو سؤزلردن حدف، توفنگيميزي گؤتوروب ساواش مئيدانيني سولاماق دئييل. آما، پوتانسييئل گوج قايناقلاريندان دوزگون فايدالانيب، ان دوغرو مودافيعه هوجومدور فلسفه سينه عمل ائتمک ده مومکوندور. گونوموزده گوج قايناغي سادجه گوجلو اوردو دئييل، ايقتيصادي اينکيشاف، دئموکراسي آنلاييشي، خبرلشمه، تبليقات، ميلليلشمه و بونا بنزر آنلاييشلاري دا قاپساماقدادير. حتّي، دوشمنين سهو و بئينالخالق قايدالارا آيقيري اولان سؤز، داورانيش و موصاحيبه لريندن ايستيفاده ائديب، گئنيش آنتي تبليقاتين رولونو اينکار ائتمک اولماز. اونون اوچونده، فيروزابادي نين جفنگيياتي قارشيسيندا آذربايجان دؤولت و ميلتي نين مؤحکم جاوابي، بوتؤو آذربايجانليلارين بير يوموروق کيمي اونون آغزيندان وورماسي، بوگون و گله جک هاديسلرده اؤز تسريني گؤسترردي دوشونولمکده دير. شومالي آذربايجانين هر طرفلي اينکاشافي، اؤزلليکله ده توکنمز ثروتلريندن دوزگون ايستيفاده ايله، داها سورعتلي ايقتيصادي اينکيشاف، سيياسي اوستونلوک، تبليقات، دياسپورانين گليشمه سي نين يانيندا نيزاعمي گوجون آرتيريلماسي، اؤزو اؤزلوگونده دوشمني يئرينده اوتورتماق اوچون بؤيوک واسيطه لر ساييلماقدادير.

ان اؤنملي عاميل اولان، گونئي آذربايجان مسلسي نين گوندمه گتيريلمه سي و چئشيتلي مئتودلارلا گونئيليلرين ميللي سياسي اينکيشافينا، تشکيلاتلانما و سيستئملشمه لرينه يارديم تشکيل ائتمکده دير. آمان سسيزي چيخارمايين، تئهراني اينجيتمگين سيايستي ايله، آنجاق اؤزوموزو آلداتميش اولاريق. بودا آيديندير کي، گونئي مسلسي نين قابارديلماسي، بئينالخالق حوقوقا اويگون و تام اوستاليقلا يئرينه يئتيريلمه ليدير. گونئيليلرين، سيستملشمه سينه، ديرچلمه سينه و سؤز صاحيبي اولماسينا گؤره آتيلان آدديملار، آزدا اولسا ايشارماقدادير. آنجاق، ايچيميزده اولان شخصي معنافئي گودنلر، ايقتيصادي قازانچ آخدارانلار، آرا قاريشديران يارامازلارين الي ايله موثبت نتيجه وئره جگيده اينانيلمازدير. عاصيميله اولموش گونئيين ديريليب ديرچلمه سي، عئيني حالدا آذربايجان جومهورييتي نين ان مؤحکم، ان گووه نيلير، ان داياناقلي و ان بؤيوک سنگريدير.

2- دؤولت معنافئي اوغرونا جبهه لشمه دوشونجه سي

تاريخه ديقتله نظر سالينسا، هئچ بير دوشمن جبهه سي نين قارشيسيندا دوران گوج تک باشينا تاب گتيرمه ميشدير. باشقا ايفاده ايله دوشمن جبهه سي نين موقابيلينده، دوست جبهه سي نين يارانماسي قاچينيلماز بير سيياسي آدديمدير.

شوبهه يوخدور کي، آذربايجانين بيرليکده فعالييت ائتمه سي اوچون ان طبيعي دوستلاري تورک دونياسي دؤولتلريدير. بودا آيديندير کي، اورتا آسيا تورک دؤولتلري ايله ان وئريملي ايشبيرليگي قورماق اوچون آذربايجانين گئنيش ايمکانلاري مؤوجوتدور. بو سيايسي هرکتده آتيلان آدديملاري اينکار ائتمک، حقيقتي دانماقدير. آنجاق، بو پوتانسييئلدن دوزگون فايدالنديغيني دا ايره لي سورمک دوغرو آنلاييش دئييلدير. اؤزلليکله گونئي تورکمه نيتسانداکي دوروم ديقتله آناليز ائديلسه و ايران داخيلينده و خاريجده گونئي تورکمنلرله گونئي آذربايجانليلار آراسينداکي ايستي موناسيبت دوزگون ترزيده اؤلچولسه، دوشمنين قارشيسيندا ديرلي بير عاميلين وارليغي داها ياخشي آنلاشيلار.

-توپراغيميزدا، سيياستيميزده، ميللي وارليغيميزدا، ثروتيميزده گؤزو اولان گوجلرله ايش بيرليگي نين زييانلي اولدوغو قدر، سوپئر گوجلر ويا بيرليکلر آراسيندا اينانيلير قوووه نين ايچينده اولماغين موثبت نتيجه لري ده بيلينمکده دير. آرتيق، بوگونکو رقابت دونياسيندا، بو ائمپيرياليست دير، او سؤمورگه چيدير، او بيريسي دينسيزدير، بو بيريسي ايمانسيزدير فلسفه سي اؤز گئچرليليگيني ايتيرميشدير. دؤولتلرين معنافئي نين اوستونلوگو، گئچميشده اولدوغو کيمي بوگونده گون کيمي آيديندير. سياسي قازانج اوغرونا، اؤز دؤولت و ميلتيني قوروماق نامينه بوتون ايمکانلاردان فايدالانماق ان دوغرو سيياست و ديپلوماسي ساييلماقدادير. اژدهالارين ايچينده اريمک دئييل، قارشيليقلي معنافئ تميني يولوندا

2

سئچيلن مودئلي آخداريرکن، حدف وسيله ني اؤرتوشدورمز تئوريسينه يوخ دئمگين زاماني گلميشدير. زاتن، گئچميشدن بوگونه دونيادا گئدن بوتون حاديثه لر گؤسترير کي، بو تئوري سادجه سادئ ديل ميلتلري آلداتماقدان باشقا بير شئي دئييلدير. حدفلرينه چاتماق اوچون آتوم بومباسي ايشله دنلر، اونو الده ائتمک اوچون دريدن قابيقدان چيخانلارين وارليغي اؤزو اؤزلوگونده گؤسترير کي، تأسوفله، حدف وسيله ني تووجيه ائدير. يالانچي ايدئولوژيلرله خالقلاري آلدادانلار، دين پرده سي آلتيندا ميلتلري ياتيردانلار، دئموکراسي آدي ايله ان چيرکين سيايستلري يئريدنلر، گؤزلريمنيزين قارشيسيندا دوام ائدير.

اؤيلسه، آذربايجانين قورونماسي، اطرافداکي دوشمنلرين ياراتديغي اويون دايره سيندن ضربه آلمادان سالامات قورتولماسي اوچون گوجلو بير جبهه نين ايچينده اولماق، هامي ايله يالانچي دوست اولاراق تجاووزلريني گؤزله مکدن داها منطيقي سيياست ساييلير.

ان دوغرو مودافيعه هوجومدور فلسفه سيني بير داها وورقولوياراق، جيدي، منطيقي، قانوني، اورکلي و تاثيرلي هوجوملار قالخاني ايله ايره ليله مک " گله جک بيزيمدير ايفاده سيني " موشدولوقچوسو اولابيلر.

گونئي آذربايجان ميللي بيرليک شوراسي

تبليقات کوميته سي

20 آوقوست 201

هیچ نظری موجود نیست:

ارسال یک نظر

از اينكه به اين مطلب نظر مي دهيد متشكريم
ياشاسين آزربايجان